Pse BE-ja është e butë me Serbinë?

Pse Serbia ka rëndësi?

Le të përmbledhim pse BE-ja dhe SHBA-ja i kushtojnë vëmendje të veçantë Serbisë. Së pari, për nga madhësia gjeografike dhe popullsia, është vendi më i madh në zonë që njihet, që nga shpërbërja e Jugosllavisë komuniste […] pas Luftës së Ftohtë, si “Ballkani Perëndimor”.

Së dyti, kjo zonë ishte skenë në vitet 1990 që ishte, deri në pushtimin e Ukrainës nga Rusia, luftërat më të dhunshme në Evropën e pas vitit 1945 – në Bosnje dhe Hercegovinë, Kroaci dhe Kosovë. Nacionalizmi ekstrem serb ishte në qendër të atyre luftërave dhe mbetet një faktor në betejat rajonale për pushtet. Së treti, zona është një fokus i konkurrencës gjeopolitike midis vendeve perëndimore, Rusisë dhe Kinës. Më shumë se fqinjët e saj, Serbia kërkon të vërë në lojë BE-në dhe SHBA-në kundër Moskës dhe Pekinit – duke u mbështetur në traditën e mos-angazhimit që u bë i famshëm nga Josip Broz Tito, udhëheqësi i vonë jugosllav. Në fund, BE-ja është nominalisht e përkushtuar për zgjerimin e anëtarësimit të saj duke përfshirë Serbinë dhe fqinjët e saj si dhe vende përtej rajonit si Moldavia dhe Ukraina.

Megjithatë, Serbia është larg përmbushjes së kushteve të anëtarësimit në BE dhe ka arsye të mira për të dyshuar nëse udhëheqja nacionaliste e djathtë në Beograd dëshiron vërtet t`i bashkohet klubit. Duke e ditur këtë, BE-ja dhe SHBA-ja kanë vënë bast për Serbinë si një partner i dobishëm për arsye të tjera – kontrollet e mërgimit, bashkëpunimi strategjik ekonomik dhe parandalimi i tensioneve në dhe rreth Kosovës nga destabilizimi i rajonit më të gjerë.

Zgjedhje të padrejta

Asnjë vend i Ballkanit Perëndimor nuk është një demokraci e përsosur, por Serbia dallon sepse mangësitë e saj janë të ngjashme me ato që BE-ja i quan fyese në Hungari, anëtari më i pacak i bllokut. Ashtu si Viktor Orbáni, kryeministri i Hungarisë, presidenti serb Aleksandar Vuçiç praktikon një formë të sundimit të një njeriu të fortë të mbushur me konservatorizëm kulturor, lidhje komode me Rusinë dhe Kinën dhe mbështetje për pakicat kombëtare jashtë vendit (hungarezët në Rumani, Sllovaki dhe Ukrainë, dhe serbët në Bosnje dhe Kosovë).

Në një artikull të kësaj jave për Institutin Carnegie, Dimitar Beçev shkroi: dikush do të mendonte se vendi ka lëvizur prej kohësh nga nivelet më të ulëta të viteve 1990. Sidoqoftë, të paktën tek disa serbë ndjesia është se ora është kthyer pas në epokën e ish-presidentit dhe të fortit Slobodan Millosheviçit. Pasi Vuçiçi dhe partia e tij në pushtet fituan një fitore të parashikueshme dërrmuese në zgjedhjet e parakohshme parlamentare të Serbisë më 17 dhjetor, BE-ja lëshoi atë që dukej si një qortim i ashpër, por në të vërtetë ishte një shuplakë e lehtë dore.

Komisionerët e BE-së Josep Borreli dhe Olivér Várhelyi thanë: “Ne konkludojmë me shqetësim se procesi zgjedhor kërkon përmirësim të prekshëm dhe reforma të mëtejshme, pasi funksionimi i duhur i institucioneve demokratike të Serbisë është në thelb të procesit të pranimit të Serbisë në BE. . . Ne gjithashtu presim që raportet e besueshme të parregullsive të ndiqen në mënyrë transparente nga autoritetet kompetente kombëtare”.

Kjo deklaratë mezi gërvishti sipërfaqen e të metave të jetës politike dhe publike serbe. Ato shkojnë përtej procedurave zgjedhore me të meta, sado të rënda. Marta Szpala, një shkencëtare politike në Qendrën për Studime Lindore me qendër në Varshavë, ka botuar dy analiza, në maj dhe dhjetor, që hyjnë në thelbin e çështjes. Në maj, ajo shkroi për “problemet sistemike të shtetit serb, duke përfshirë dobësinë e institucioneve të tij publike (të cilat janë në varësi të interesave të partive në pushtet), agresionin e kudondodhur në hapësirën publike, korrupsionin dhe lidhjet ndërmjet qeverisë dhe krimi i organizuar”.

Pas votimit të dhjetorit, ajo vërejti: “Zgjedhjet kanë konsoliduar pozicionin hegjemonist të Presidentit Aleksandër Vuçiç dhe kanë vërtetuar efektivitetin e strukturave të tij partiake në mbajtjen e kontrollit të shoqërisë. Në këtë gjendje nuk mund të zhvillohen zgjedhje plotësisht demokratike”.

Korrupsioni, krimi i organizuar dhe ‘bota serbe’

Në korrik, SHBA-ja vendosi sanksione ndaj Aleksandër Vulinit, një aleat i Vuçiçit, i cili drejtonte agjencinë e sigurimit shtetëror të Serbisë, për përfshirje të dyshuar në krimin e organizuar ndërkombëtar, operacione narkotike, lidhje me Rusinë dhe “përkrahjen e rrëfenjave etno-nacionaliste që nxisin paqëndrueshmërinë në Serbi dhe rajon”. Cilat janë këto rrëfime?

Nën Vuçiçin, i cili ka qeverisur Serbinë si kryeministër (2014-2017) dhe president (2017 deri më sot), autoritetet kanë përkrahuar idenë pseudo-filozofike të një “srpski svet”, ose të botës politike dhe kulturore serbe. Ky koncept i shpenguar, por i rrezikshëm kujton mbështetjen e presidentit Vladimir Putin të një “mir rus” të gjerë, ose një bote ruse. Moska dhe Beogradi synojnë të drejtën dhe detyrën për të “mbrojtur” rusët dhe serbët etnikë që jetojnë jashtë shtetit amë.

Në Ukrainë, ne kemi parë se ku të çon kjo. Ka paralele me Bosnjën, ku udhëheqja serbe e Bosnjës kërkon të minojë organet e autoritetit shtetëror, dhe me Kosovën, ku dhuna shpërtheu në shtator dhe SHBA-ja paralajmëroi për një grumbullim të forcave të armatosura serbe pranë kufirit.

Butë me mërgimin serb

Një arsye pse BE-ja i zvogëlon vështirësitë e saj me Serbinë është se qeveritë i frikësohen një kthimi të krizës së refugjatëve dhe emigrantëve që përfshiu Evropën juglindore dhe tronditi vetë BE-në në 2015-2016. Në sytë e Brukselit, bashkëpunimi serb është kritik në parandalimin e përsëritjes së atij episodi.

Në mars, Ylva Johansson, komisionerja për çështjet e brendshme të BE-së, vizitoi Beogradin dhe lavdëroi autoritetet serbe për frenimin e mërgimtarëve të paligjshëm. Ajo vuri në dukje se përfaqësuesit e Frontex, agjencia e kontrollit të kufirit të BE-së, do t'i bashkohen policisë serbe në patrullimin e kufijve të vendit me shtetet e tjera jashtë BE-së si Bosnja dhe Maqedonia e Veriut.

Bashkëpunimi për mërgimin ishte një temë kryesore e vizitës së kryeministrit italian Giorgia Meloni në Beograd në dhjetor. Për qeverinë e Italisë, pak çështje janë më urgjente sesa frenimi i mërgimit të paligjshëm – dhe kjo do të thotë të mbash marrëdhënie të mira me Serbinë, siç shpjegon Maja Bjeloš në një artikull për Institutin Italian për Studime Politike Ndërkombëtare.

Litiumi

Megjithëse ekonomia e Serbisë është relativisht e vogël, vendi ka një nga depozitat më të mëdha të njohura të litiumit në Evropë, një mineral thelbësor për prodhimin e baterive të automjeteve elektrike. Në shtator, komisioneri i BE-së Maroš Šefčovič nënshkroi një letër qëllimi me Vuçiçin për një bashkëpunim BE-Serbi për bateritë dhe lëndët e para kritike, duke përfshirë litiumin. Siç përcakton ky dokument i Komisionit Evropian, ka “rritje shpërthyese të kërkesës” për litium. Planet e kalimit të gjelbër të BE-së varen nga qasja e sigurt në të. Serbia do të ishte furnizuesi më i përshtatshëm – megjithëse do të nënkuptonte rivendosjen e një projekti të minierave të litiumit që u anulua në vitin 2022 pas protestave lokale për ndikimin e mundshëm mjedisor.

Kosova

Një arsye e tretë për qasjen e butë të BE-së ndaj Serbisë është Kosova, ish-krahina serbe […] me shumicë shqiptare etnike (vendet që nuk e njohin shpalljen e pavarësisë së Kosovës në 2008 përfshijnë Serbinë, Rusinë, Kinën dhe pesë shtete të BE-së). Për evropianët dhe amerikanët njësoj, një konflikt në Evropën Juglindore do të ishte jashtëzakonisht i padëshiruar në kohën kur mbështetja për Ukrainën po vihet nën trysni dhe rreziqet e veprimeve kineze kundër Tajvanit janë gjithnjë të pranishme.

Në një artikull tjetër për Carnegie Europe, Bechev argumenton se BE-ja dhe SHBA-ja kanë tentuar në vitet e fundit ta trajtojnë Vuçiçin si “të rriturin proverbial në dhomë” - çelësi i një kompromisi që do të përfshinte njohjen serbe të Kosovës në këmbim të autonomisë për minoritetin etnik serb i shtetit të ri. Është rruga e duhur përpara dhe është e vërtetë që liderët e Kosovës e kanë zvarritur çështjen jetike të vetëqeverisjes lokale serbe.

Por Vuçiçi ka treguar pak shenja për të shlyer besimin që liderët perëndimorë i kanë dhënë atij për të arritur një zgjidhje për Kosovën.

Marrëveshjet serbe me Rusinë dhe Kinën

Ndërkohë, Vuçiçi ka refuzuar t`i bashkohet sanksioneve perëndimore ndaj Moskës. Serbia dhe Rusia madje nënshkruan një marrëveshje të politikës së jashtme në shtator 2022, kur pushtimi i Putinit në Ukrainë ishte në lëvizje të plotë. Në një tjetër shenjë të distancës diplomatike të Beogradit nga BE-ja dhe SHBA-ja, Serbia dhe Kina arritën një marrëveshje të tregtisë së lirë në tetor që përfshin hapësirën për bashkëpunim ushtarak. Në përgjithësi, lind pyetja: a po sjell ndonjë përfitim real përpjekja e perëndimit për të punuar në mënyrë konstruktive me Vuçiçin? Për sa i përket cilësisë së demokracisë serbe, politikës së jashtme pro-perëndimore dhe kërkimit të një marrëveshjeje për Kosovën, përgjigja do të dukej të ishte një “Jo”.

Përgatiti për botim Ylli Përmeti – i cili këshillon të lexohet dhe analiza e tij lidhur me arsyet se pse Uashingtoni i Bajdenit është i butë me Serbinë dhe tërheq vëmendjen lidhur me kllapat katërore të shtuara në analizën e analistit të Financial Times, me të cilat ai ka vërejtjet e tij.

Arsyet e ‘trimërimit’ të Serbisë ndaj Uashingtonit