Drejtoresha e policisë federale të Zvicrës: jemi në shënjestër të mafias shqiptare

Drejtoresha e re e Policisë Federale Zvicerane, Eva Wildi-Cortes, ka ngritur shqetësime të rëndësishme në lidhje me përshkallëzimin e dhunës dhe praninë në rritje të grupeve të krimit të organizuar në Zvicër, përfshirë rrjetet kriminale nga Ballkani. Në një intervistë me gazetën zvicerane “NZZ am Sonntag”, Wildi-Cortes deklaroi se organizatat kriminale nga Shqipëria veprojnë në terrenin zviceran, të cilat janë të përfshira në trafikun e drogës dhe pastrim parash. Ajo theksoi veçanërisht një rrjet droge që ajo beson se drejtohet nga mafia kosovaro-shqiptare.

“Po flasim për organizatën e njohur italiane ‘Ndrangheta’, e cila përdor Zvicrën për pastrim parash. Por edhe për organizatat kriminale nga Shqipëria, të cilat janë të përfshira si në prodhimin ashtu edhe në shpërndarjen e drogës; për Mafian nga Holanda, e cila shpërthen në bankomate; dhe për grupet nigeriane si Black Axe, të cilat përfitojnë miliarda përmes mashtrimit dhe shfrytëzimit të vajzave të reja. Zvicra është shumë tërheqëse për këto grupe”, tha Wildi-Cortes. Ajo përshkroi gjithashtu se si vepron zinxhiri i trafikimit të kokainës në Evropë, duke përmendur një bashkëpunim midis mafias shqiptare, mafias italiane dhe Makro-Mafias.

“Shembull: tregtia e kokainës. Importi i kokainës në Evropë kontrollohet nga mafia shqiptare, ndërsa importi financohet nga mafia italiane. Sapo mallrat mbërrijnë në portin e Roterdamit, përfshihet Makro-Mafia, e cila kujdeset për shpërndarjen. Pastaj, kokaina përhapet nga grupe lokale në qytete si Berna ose Cyrihu. Zvicra shërben njëkohësisht si vend tranziti, një pikë shpërndarjeje dhe si një treg përfundimtar”, tha ajo.

Përveç veprimtarive të drogës, Wildi-Cortes theksoi gjithashtu mënyrat e shumta të pastrimit të parave të përdorura nga këto organizata. Wildi-Cortes përmendi se përveç berberhaneve dhe bareve të shisha-s, paratë pastrohen edhe në dyqanet Bubble Tea, shërbimet e picave dhe agjencitë e udhëtimit.

“Vitin e kaluar, një agjenci udhëtimesh e specializuar në Ballkan, në qendër të Lucernës, u bë objekt i një operacioni të madh policor. Hetuesit e këqyrën atë për më shumë se një vit dhe regjistruan 750 vizita nga persona të dyshuar si korrierë droge dhe parash. Ky rrjet droge drejtohej nga mafia kosovaro-shqiptare”, përfundoi Wildi-Cortes.