Amerikanët përparojnë me rrëzimin “nga brenda” të Vuçiçit

Në “Shqipëria Jonë” të datës 12 mars të këtij viti, u botua një shkrim imi, i titulluar: “Telashet e Vuçiçit me krimin e organizuar dhe diplomatët amerikanë për rrëzimin e tij”. Shkrimi ishte një analizë e veprimeve të grupit kriminal, të udhëhequr nga një kryekriminel i quajtur Velo Bellivuk, të cilin organet e pushtetit e kishin arrestuar e burgosur në muajin shkurt, bashkë me 19 kriminelë të tjerë. Ai grup kriminal ishte i lidhur me strukturat e pushtetit të Serbisë nga radhët e policisë, ushtrisë, gjyqësisë dhe politikës.

Sipas shkrimeve të shumta të mediave serbe, edhe atëherë pista e hetimeve arrinte deri te ministri i policisë, Nebojsha Stefanoviç. Ndërkohë, kryetari i Serbisë A.Vuçiç, bëri një rokadë dhe Stefanoviçin prej ministrit të policisë e emëroi ministër të mbrojtjes, ndërsa ministrin e mbrojtjes A.Vullinin, të cilin e ka si megafon dhe më të besueshëm, e emëroi ministër të policisë! As Vullini nuk mund të jetë krejt i larë nga përfshirja në grupin kriminal të Velo Telashes, sepse në kohën kur Vullini ishte ministër i mbrojtjes, grupi kriminal i Velos mbante ushtrime në poligonet e ushtrisë, me armë dhe me fishekë të ushtrisë.

Për krimet e tyre të tmerrshme kanë folur Vuçiçi, Vullini etj., dhe kanë shkruar mediat e kanë paraqitur reportazhe televizionet e Serbisë. Ndërsa ministri aktual i policisë, A.Vullin, pas një aksioni për konfiskimin e armëve, ka thënë se grupi kriminal ka pasur për qëllim ta likuidojë kryetarin e Serbisë, A.Vuçiçin, duke e treguar në televizion një pushkë, snajper të veçantë.

Sidoqoftë, në hetimet e para të atij grupi kriminal, si të dyshuar janë përmendur: ish-ministri i policisë, Nebojsha Stefanoviç; ish-sekretarja shtetërore e Ministrisë së Punëve të Brendshme, Dijana Hërkalloviç; sekretari i përgjithshëm i Qeverisë së Serbisë, Novak Nediq; kryetari i Gjykatës së Lartë të Beogradit, Alleksandër Stepanoviç; funksionari i lartë i Beogradit, Damir Handanoviç; kryetari i Lidhjes Futbollistike të Serbisë, Sllavisha Kokez; dhe udhëheqësi i klanit kriminal “Kavasi”, Radoje Zvicer (nga Mali Zi).

Ndërsa Velo Nevola me disa nga grupi i tij kriminal mbahet në paraburgim, kanë vazhduar hetimet dhe gjithnjë e më tepër i janë ofruar ministrit Stefanoviç si njeriu i cili i ka mbrojtur e përkrahur grupin kriminal me qëllim rrëzimin e Vuçiçit nga pushteti.

Çëshjta e likuidimit të Vuçiçit, ose vetëm e rrëzimit nga pushteti, me dorëheqje, është bërë temë e nxehtë në mediat serbe edhe këto ditë, duke e përmendur gjithnjë e më shpesh ministrin aktual të mbrojtjes, Nebojsha Stefanoviç. Gazetat dhe televizionet që janë nën kontrollën e Vuçiçit gjithnjë e më zëshëm po e paraqesin Stefanoviçin  si kriminel dhe tradhtar, i cili ka përkrahur mafian dhe ka planifikuar rrëzimin e Vuçiçit nga pushteti, apo vrasjen e tij. Ia përmendin takimet e tij me ambasada të huaja, si dhe një udhëtim në Guantanama, ku gjoja ka pasur kontakte me njerëz të caktuar për realizimin e planit të tij.

Veprimet e Stefanoviçit kundër Vuçiçit e lidhin atë me pronarin e Pltanazit “Jovanjice” në Stara Pazova, Predrag Kollunxhija. Në pronën e Kollunxhijës  janë gjetur 4 tonë marihuanë e kanabis. Stefanoviçi gjoja i ka thënë Kollunxhisë se nëse do të shpëtosh nga dënimi, deklaro se ke qenë i lidhur  me djalin e Vuçiçit (Danillon)  dhe vëllain Andrea. Përndryshe, zyrtarë policorë kanë thënë  se me mjetet e fituara nga “Jovanjica”, është financuar fushata e diplomacisë së Serbisë për tërheqjen e njohjeve të pavarësisë së Kosovës nga disa shtete.

Mediat spekulojnë rrëzimin e Vuçiçit nga pushteti, se janë krijuar aferat “Jovanjica”, “përgjimi i telefonave” etj., se në këtë qëllim janë bashkuar strukturat kriminale edhe nga radhët e partisë së tij dhe zyrtarë të lartë të pushtetit, por edhe një pjesë e opozitës (së Jeremiçit) dhe qendrat e forcave nga jashtë.

Vetë Vuçiçi ka pohuar se në mënyrë të pamohueshme është vërtetuar se telefonat e tij dhe të familjarëve të tij janë përgjuar, në mënyrë të kundërligjshme, duke dashur ta akuzojnë vëllain e tij Andrea, pa fije faji, me qëllim për të komprometuar Vuçiçin.

Në proces të hetimeve, në lidhje me aferën “Jovanjice” dhe përgatitjen grushtshtetit për rrëzimin e Vuçiçit, Shërbimi i kontrollit të brendshëm, që është nën kontrollin e drejpërdrejt të ministrit të plicisë, A.Vullinit, këto ditë për të tretën herë i kanë ftuar për testim në poligraf (detektor të gënjeshtrave) katër inspectorë policie:

l. Vlladimir Rebiq, drejtor i policisë në MPB të Serbisë;

2. Sllobodan Millenkoviç, kryeshef i sektorit për luftimin e narkomanisë;

3. Dushan Mitiq, inspector-shef i Operativës; dhe

4. Dijana Hërkalloviq, sekretare shtetërore e MPB

Por tre prej tyre (Dijana Hërkalloviç, Sllobodan Millenkoviç) dhe Dushan Mitiq kanë refuzuar t’i nënshtrohen testit.

Deklarata të ndryshme lidhur me çështjen

Çështjen e aferës në lidhje me përgjimin, ua lë organeve kompetente, ka thënë Vuçiçi. E di se kur njërin nga kreu i MUP-it (MPB) e kanë pyetur, ç`të re ka, ai është përgjigjur: “Asgjë, përveç përgjimit të kryetarit”, dhe menjëherë një prej të pranishmëve ka dalë përjashta, tha Vuçiçi. Një zyrtar i lartë i policisë serbe, që është kryeshef i Shërbimit për metodat e hulumtimit në MPB, Tomisllav Radomanoviq, e ka akuzuar ministrin  Nebojsha Stefanoviç, se ishte organizatori kryesor i lidhjeve paralele në atë ministri. Ish-avokati i popullit në Serbi, Sasha Jankoviç, i cili ka qenë në garë për kryetar të Serbisë në zgjedhjet e fundit, ka pranuar se “disa ambasada të jashtme dhe të fortit nga Perëndimi, i kanë propozuar këtij që t’i afrohet sa më afër kryetarit Vuçiç, në mënyrë që ta rrëzojë nga brenda në një moment të caktuar dhe të vihet në vend të tij; ka qenë e planifikuar që “Vuçiçin ta lëshojë zemra” ka thënë Jankoviçi (“Alo.s/Objektiv,14.09.2021).

Ministri aktual i policisë së Serbisë, A.Vullin, fushatën për përgjimin dhe diskreditimin e Vuçiçit, e ka quajtur “Tradhti! Të jashtmit dhe një pjesë e MPB deshën ta rrëzojnë Vuçiçin” (Politika, 8.X.2021). Vulini e ka informuar Vuçiçin se “disa pjesë të MPB kanë punuar kundër shtetit dhe është e qartë se ka ekzistuar lidhja e udhëheqjes paraprake të MPB me qendrat e forcave të jashtme”.

Kryeministrja e Serbisë, Ana Bërnabiç, në TV1 (10 tetor 2021), deklaroi se “është vërtetuar se strukturat e MPB kanë dashur ta rrëzojnë Vuçiçin, duke përgjuar dhe inkriminuar vëllain e tij, Andeja Vuçiç, për aferën “Jovanjica”; kanë dashur ta kompromentojnë e ta detyrojnë kryetarin të japë dorëheqje. Për këtë kemi prova të pamohueshme. Në këtë kanë qenë të përziera edhe shërbime të jashtme të sigurimit dhe një pjesë e opozitës politike (Mirosllav Alleksiç, Marinika Tepiq, etj.). Gjyqësori duhet ta bëjë pjesën e vet të punës, ndërsa Qeveria do të sigurojë kushtet që ata të jenë plotësisht të lirë ta bëjnë punën e tyre dhe se askush nuk do të kursehet”.

Janë këto fjalë të mëdha të ministrit të policisë dhe kryetares së Qeverisë, pas të cilave duhet të veprojnë organet e drejtësisë.

Pas mbledhjes së Kryesisë së Partisë Përparimtare të Serbisë, partia e Vuçiçit që është në pushtet (më 9 tetor 2021), ku është edhe ministri Stefanoviç, aq i përfolur për grushtet, Vuçiçi thotë se ka biseduar i vetëm me Stafanoviçin, por nuk ka dhënë asnjë hollësi për atë bisedë. Ku ka tym, ka edhe zjarr, thotë urtia popullore. I daltë edhe flaka!