...lufta fillon me kuptimin e shkaqeve të krizave dhe ajo vazhdon me ndryshimin e mendësisë dhe praktikës...

Bosnje, vendi tjetër ku po shkatërrohet ekosistemi me ndërtimin e hidrocentraleve

Dashamirë të kanotazhit nga e gjithë bota u mblodhën të hënën në lumin Vrbas të Bosnjes për të protestuar kundër ndërtimit në masë të hidrocentraleve në vendet e Ballkanit Perëndimor

Voa

02/10/2018 - 07:25

Dashamirë të kanotazhit nga e gjithë bota u mblodhën të hënën në lumin Vrbas të Bosnjes për të protestuar kundër ndërtimit në masë të hidrocentraleve në vendet e Ballkanit Perëndimor. Veprimtarët thonë se ndërtime të tilla kërcënojnë të shkaktojnë dëme të pariparueshme të mjedisit.

Aktivistët në Bosnje prej vitesh po bëjnë fushatë kundër planeve për të ndërtuar dy hidrocentrale të rinj në lumin Vrbas. Dy objektet janë pjesë e një rrjeti të planifikuar prej gati 3 mijë hidrocentralesh në të gjithë Ballkanin Perëndimor, një rajon i njohur si "Zemra Blu" e Evropës për lumenjtë e saj të pastër.

Rreth një e treta e këtyre hidrocentraleve parashikohet të ndërtohen në zona të mbrojtura turistike, sipas një studimi të organizatave RiverWatch dhe EuroNatur.

Autoritetet dhe investitorët i shohin hidrocentralet si një zgjidhje pa ndotje dhe si alternativë ndaj formave të tjera të energjisë. Ata thonë se kjo do të ndihmojë vendet e Ballkanit Perëndimor për të arritur objektivat e energjisë së rinovueshme të caktuara nga Bashkimi Evropian, ku këto vende përpiqen të anëtarësohen.

Por veprimtarët thonë se digat do të shterrojnë lumenjtë që përdoren nga komunitetet vendëse për ujë të pijshëm, bujqësi, peshkim dhe turizëm si dhe do të shkatërrojnë habitatin e specieve të rralla, si salmoni i Danubit apo rrëqebulli i Ballkanit.

Një studim i fundit tregon se në një të tretën e Ballkanit lumenjtë janë në gjendje natyrore të pacenuar në krahasim me pjesën tjetër të Evropës ku ato janë shkatërruar në shumicën e tyre, thotë Gabriel Schwaderer, kreu i organizatës EuroNatur.   

Albania Web Design & Development by: WWW.FIT.ALFIT.AL WEB DESIGN ALBANIA