...lufta fillon me kuptimin e shkaqeve të krizave dhe ajo vazhdon me ndryshimin e mendësisë dhe praktikës...

Mbi 5200 të pastrehë dhe 1200 banesa të dëmtuara

Në Shqipëri, një bilanc i parë i dëmeve flet për mbi 1200 banesa të dëmtuara, disa dhjetra prej të cilave të shkatërruara e të pabanueshme, ndërsa janë mbi 5200 personat e pastrehë

Voa

29/11/2019 - 22:16

Në Shqipëri, një bilanc i parë i dëmeve flet për mbi 1200 banesa të dëmtuara, disa dhjetra prej të cilave të shkatërruara e të pabanueshme, ndërsa janë mbi 5200 personat e pastrehë dhe ata që janë sistemuar në çadra apo struktura hoteliere. Shifrat u bën të ditura sot gjatë mbledhjes së Qeverisë, ku u vendos shtrija e gjendjes së Jashtëzakonshme edhe në qytetin e Laçit.

Operacionet e kërkimit në gërmadhat e ndërtesave të rrënuara konsiderohen të mbyllura, përveç një zone, në plazhin e Durrësit, ku vijon puna pasi dyshohet që të jetë ende një trup. Bilanci i viktimave arriti në 49 persona. Durrësi rezulton kështu, të jetë qyteti me numrin më të madh të njerëzve që kanë humbur jetën, 25 viktima. Goditjet e tërmetit shkatërruan duke rrënuar plotësisht, dy hotele në zonën e plazhit, dy pallate në qytet si dhe një banesë trekatëshe në zonën e ish Kënetës. Ndërsa në Thumanë, ku kërkimet u mbyllën që ditën e djeshme, ishin 23 persona që humbën jetën nën rrënojat e dy pallateve të rrëzuar. Në këtë qytezë u zhvillua sot dhe ceremonia e përcjelljes së viktimave të tërmetit.

Ndërsa dy ditë më parë qeveria shpalli gjendjen e jashtëzakonshme në Tiranë dhe Durrës, sot në listë u përfshi edhe Laçi për shkak të dëmeve të mëdha të rregjistruara dhe në këtë zonë. Një ditë më parë një gjë e tillë u kërkua nga kryetari demokrat Lulzim Basha. “Në këtë rast na përputhen shqetësimet dhe idetë”, deklaroi ryeministri nga ana e tij kryeministri, i cili ftoi opozitën të bëhet pjesë dhe e Komitetit për Rindërtimin e dëmeve nga tërmeti.

Zonat e prekura, janë vizituar këto ditë nga drejtuesit më të lartë të Kosovës, të cilët janë gjendur pranë banorëve në një shenjë mbresëlënëse solidariteti. Sot në Durrës ishte kryeministri në ikje Ramush Haradinaj, dhe shumë anëtarë të kabinetit të tij qeveritar. Ndërsa më vete, ishte dhe kryeministri i ardhshëm Albin Kurti. Mbështetja dhe ndihma nga Kosova nuk ka qenë vetëm përmes strukturave shtetërore, por dhe nga qytetarët dhe bizneset, të cilat vetëm ditën e sotme sollën 100 ton ndihma

Shqipëria i kërkon BE-së ekspertë për vlerësimin e dëmeve

Shqipëria ka aktivizuar për herë të dytë, Mekanizmin e Mbrojtjes Civile të Bashkimit Europian. Pas kërkesës së parë menjëherë pas tërmetit, e cila bëri të mundur mobilizimin e tre ekipeve nga Greqia, Italia dhe Rumania për të ndihmuar operacionet e kërkim-shpëtimit, qeveria shqiptare kërkon tani dhe ekspertë për të bërë vlerësimin e dëmeve në ndërtesa. Sipas një deklarate të Delegacionit të Bashkimit europian në Tiranë “Italia dhe Greqia janë ofruar për të ndihmuar Shqipërinë në këtë drejtim”.

Njoftimi bën të ditur se “ekipi i Mekanizmit për Mbrojtjen Civile të BE-së po punon ngushtësisht me autoritetet vendore dhe donatorët për një vlerësim të konsoliduar të nevojave, me përparësi dhënien e ndihmës në materiale. Mbrëmjen e djeshme, Delegacioni i BE-së kryesoi një takim me shtetet anëtare të BE-së, vendet jo anëtarë të BE që marrin pjesë në Mekanizmin e Mbrojtjes Civile të BE-së, si dhe partnerët e organizatat ndërkombëtare (agjencitë e OKB, USAID etj.), mbi reagimin ndaj emergjencës”.

Ambasadori i BE-së Luigi Soreca deklaroi sot se "Bashkimi Evropian dhe shtetet anëtare të tij janë duke qëndruar përkrah Shqipërisë dhe po punojnë pa ndalim për të ofruar ndihmë në këtë moment shumë të vështirë. Ekspertët e Mekanizmit të Mbrojtjes Civile të BE dhe dhjetë Shteteve Anëtare të BE, janë aktualisht në terren për të ndihmuar autoritetet qendrore dhe vendore.

Ekipi europian për Mbrojtjen Civile e ka bazën e tij në Delegacionin e BE në Tiranë dhe përbëhet nga ekspertë nga Austria, Franca, Gjermania, Italia, Holanda, Suedia dhe Mbretëria e Bashkuar. Dy ekspertë nga Vlerësimi dhe Koordinimi i fatkeqësive të OKB (UNDAC) janë gjithashtu pjesë e komanduar e këtij ekipi.

   

Albania Web Design & Development by: WWW.FIT.ALFIT.AL WEB DESIGN ALBANIA