Vjen “përbindëshi” prej 100 mijë tonësh i Amerikës

“Shtetet e Bashkuara të Amerikës sapo i dërguan një mesazh prej 100 000 tonelatash botës”.

Ky ishte komenti i presidentit Donald Trump për hyrjen në shërbim të anijes luftarake më të madhe që ka parë njerëzimi.

Mesazhi vjen në formën e aeroplanmbajtëses USS Gerald R. Ford, një përbindësh që ka kushtuar 13 miliardë dollarë dhe që sipas ekspertëve ka në bordin e saj teknologjinë më të fundit, një pjesë e së cilës eshte sekret.

Vetë Trampi tha se kjo aeroplanmbajtëse do të qetësojë aleatët dhe do të bëjë armiqtë të dridhen, sepse tregon qartësisht se kur Amerika mbërrin, vjen me forcë të jashtëzakonshme.

Megjithëse ende nuk është përcaktuar sektori i planetit ku mali i hekurt do të shërbejë, ekspertët i kanë drejtuar sytë nga Azia, sidomos tek zonat e tensionit të saj rreth Koresë dhe Veriut, por edhe Rusisë e Kinës.