SHBA-ja zbulon strategjinë e mbrojtjes: tërhiqet nga Evropa për t`iu kundërvënë Kinës në Indo-Paqësor

SHBA-të do të rrisin aftësitë e tyre ushtarake në Indo-Paqësor si pjesë e një strategjie të re mbrojtëse të hartuar për të siguruar që Kina nuk mund të bllokojë qasjen amerikane në një rajon që po bëhet qendra botërore e fuqisë ekonomike.

Në një strategji të re kombëtare të mbrojtjes të botuar të premten në mbrëmje, Pentagoni tha se do të përqendrohej në mbrojtjen e atdheut - me një përqendrim në hemisferën perëndimore - dhe në pengimin e Kinës në Indo-Paqësor.

NDS tha se siguria dhe begatia e SHBA-së ishin të lidhura me “aftësinë e Amerikës për të tregtuar dhe për t`u përfshirë nga një qendrim fuqie në Indo-Paqësor”.

Dokumenti merr një qasje më të butë ndaj Kinës sesa NDS-ja e parë e Presidentit Donald Trump në vitin 2018, e cila tha se Pekini donte ta formësonte botën sipas përfytyrimit të “modelit të saj autoritar”. Nuk përmendi Tajvanin, i cili është vendi më i mundshëm ku mund të shpërthejë një përplasje mes SHBA-së dhe Kinës.

Dokumenti vjen një muaj pasi Trampi botoi strategjinë e tij të sigurisë kombëtare, e cila i dha përparësi hemisferës perëndimore, të cilën NDS tha se do të ndihmonte në luftën kundër narko-terrorizmit, përveç sigurimit të qasjes në Groenlandë, Gjirin e Meksikës dhe Kanalin e Panamasë.

NDS tha se nëse Kina dominonte Indo-Paqësorin, do të ishte në gjendje “të vinte veton në mënyrë efektive qasjes së amerikanëve në qendrën ekonomike të gravitetit të botës”. Dokumenti i strategjisë gjithashtu u bëri thirrje aleatëve të bënin më shumë për të forcuar mbrojtjen kolektive në rajon.

Ai tha se SHBA-të do të “ngrinin një mbrojtje të fortë mohimi përgjatë zinxhirit të parë të ishujve”, duke iu kundërvënë një zone të Indo-Paqësorit që shtrihet nga Japonia, përtej Tajvanit dhe Filipineve, deri në Borneo dhe Gadishullin Malajzian.

Strategjia tha se Trampi kërkonte “një paqe të qëndrueshme, tregti të drejtë dhe marrëdhënie respekti me Kinën”, por nga një “pozitë force”. Ajo shtoi se Pentagoni do të zgjeronte gamën e komunikimeve me ushtrinë kineze për të mbështetur “qendrueshmërinë strategjike” me Pekinin.

NDS tha se SHBA-të nuk po përpiqeshin të mbizotëronin, mbysnin ose poshtëronin Kinën. “Qëllimi ynë është i thjeshtë: Të parandalojmë këdo, përfshirë Kinën, që të jetë në gjendje të na mbizotërojë ne ose aleatët tanë.”

Ai shtoi se Uashingtoni dëshironte të vendoste kushtet ushtarake për “një ekuilibër pushteti në Indo-Paqësor që na lejon të gjithëve të gëzojmë një paqe të mirë”.

NDS pretendoi se SHBA-të nuk do të shpërqendroheshin më nga “ndërhyrja, luftërat e pafundme, ndryshimi i regjimit dhe ndërtimi i kombit”. Por kjo vjen pasi administrata e Trampit ka bombarduar objektet bërthamore në Iran, ka kapur presidentin venezuelian Nicolás Maduro dhe ka shkaktuar një krizë me Evropën për shkak të Groenlandës.

Dokumenti tha se Rusia do të mbetej një “kërcënim i vazhdueshëm, por i drejtueshëm për anëtarët lindorë të NATO-s për të ardhmen e parashikueshme”. Lidhur me Lindjen e Mesme, tha se Irani mbetej kërcënimi më i madh dhe dukej “i vendosur të rindërtonte forcat e tij ushtarake konvencionale” dhe mund të përpiqej përsëri të ndërtonte armë bërthamore.

Duke e quajtur Izraelin një “aleat model”, Pentagoni tha se aleatët dhe partnerët e SHBA-së në Lindjen e Mesme duhet të mbajnë mbi supe pjesën më të madhe të barrës së luftimit të Iranit, por se Uashingtoni mund të ndërmarrë “veprime të fokusuara dhe vendimtare” në rajon.

Trampi tha të enjten se Uashingtoni po ndërtonte baza ushtarake në Lindjen e Mesme “për çdo rast”. Rajoni ishte përgatitur për ndërhyrjen e SHBA-së, ndërsa qeveria iraniane kreu një shtypje brutale ndaj protestuesve këtë muaj, por presidenti e zbuti retorikën e tij pas lobimit nga zyrtarët izraelitë dhe arabë.

Sipas strategjisë, Pentagoni do të krijojë “rrugë të besueshme” për të garantuar qasjen ushtarake dhe tregtare në Groenlandë, Gjirin e Meksikës dhe Kanalin e Panamasë. Ai pretendoi se ndikimi i kundërshtarëve ishte rritur në ato zona.

Pasi kërcënoi vazhdimisht të përdorte veprime ushtarake për të marrë Groenlandën, Trampi të mërkurën u tërhoq dhe përjashtoi “përdorimin e forces” për ta vënë ishullin Arktik nën mbikëqyrjen e SHBA-së, duke u pajtuar të ndiqte bisedimet me Danimarkën dhe Nuukun.

Strategjia vuri në dukje se SHBA-të do të punonin me “besim të mire” me Kanadanë dhe vendet e Amerikës Latine, por paralajmëroi se Pentagoni ishte “gati të ndërmerrte veprime të fokusuara dhe vendimtare” në mënyrë të njëanshme nëse këto vende nuk “bënin pjesën e tyre për të mbrojtur interesat tona të përbashkëta” në hemisferën perëndimore.