Uashingtoni shton trysninë ndaj aleatëve evropianë për të ashpërsuar qendrimin ndaj Kinës

Administrata e Bajdenit shtyn Nato-n t`i japë përparësi frenimit të Pekinit. Sipas Financial Times, SHBA-ja po shtyn aleatët evropianë për të marrë një qendrim më të ashpër kundrejt Pekinit ndërsa përpiqet të rrisë udhëheqjen e saj mbi Ukrainën për të fituar më shumë mbështetje nga vendet e Nato-s për përpjekjet e saj për t`u përballur me Kinën në Indo-Paqësor.

Sipas njerëzve në dijeni të bisedimeve mes SHBA-së dhe aleatëve të Nato-s, Uashingtoni ka lobuar javët e fundit në aleatët transatlantik për të ashpërsuar gjuhën ndaj Kinës dhe të fillojnë të punojnë me veprime kontrete për të kufizuar Pekinin.

Në mbledhjen e nisur sot, aleatët do të diskutojnë sfidën e Kinës në terma konkretë dhe kërkojnë të zbatojnë çka nënshkruajnë për të lëvizuar nga vlerësimi i problemit në ngritjen e problemit. Ministrat do të diskutojnë një raport të ri mbi Kinën, i hartuar për të ashpërsuar qendrimin e aleancës, e cila e identifikoi Pekinin si një “sfidë” për “interesat, sigurinë dhe vlerat” e saj për herë të parë.

Raporti do të diskutojë zhvillimin ushtarak të Kinës, përpjekjet për të ndikuar mbi anëtarët e Nato-s dhe vendet e treta, dhe marrëdhëniet e Pekinit me Moskën. Por shumica e vendeve evropiane, Gjermania dhe Franca ngurrojnë të mbështesin tërësisht kërkesën amerikane. Zyrtarët evropianë kanë frikë se mos përplasja me Kinën çon në izolimin tërësor të Evropës dhe gjendet në mes të luftës mes Kinës dhe SHBA-së.

Më herët, Voa raportonte se ministrat e Jashtëm të NATO-s do të takohen për dy ditë me radhë në kryeqytetin e Rumanisë, Bukuresht, duke filluar nga dita e martë. Ata pritet të zotohen për mbështetje të vazhdueshme për Ukrainën kundër agresionit rus.

Në një konferencë shtypi të hënën, pas një takimi me Presidentin e Rumanisë Klaus Iohannis, sekretari i Përgjithshëm i NATO-s Jens Stoltenberg i kërkoi aleancës të rrisë mbështetjen e saj në rajon. "Investimi në mbrojtjen tonë është thelbësor, pasi po përballemi me krizën më të madhe që i kanoset sigurisë në një brez".

Zoti Stoltenberg tha se si përgjigje ndaj agresionit rus në Ukrainë, NATO po përforcon praninë nga Baltiku në rajonin e Detit të Zi. Kreu i aleancës tha gjithashtu se janë dislokuar grupe të reja beteje, përfshirë një të udhëhequr nga Franca në Rumani, ndërsa avionët luftarakë nga Kanadaja po ndihmojnë: “për të ruajtur qiejt tanë të sigurt dhe raketat amerikane Patriot po forcojnë mbrojtjen e NATO-s. Ne do të bëjmë atë që është e nevojshme për të garantuar mbrojtjen e të gjithë aleatëve tanë".

Zoti Stoltenberg theksoi gjithashtu mbështetjen e vendeve partnere që përballen me trysni nga Rusia, si Bosnja Hercegovina, Gjeorgjia dhe Moldavia.

Presidenti rumun Klaus Iohannis tha se vendimi i arritur në takimin e Madridit për të rritur numrin e trupave e pajisjet ushtarake të NATO-s në krahun lindor të aleancës, duhet të hyjë në fuqi sa më shpejt të jetë e mundur.

Zoti Stoltenberg përsëriti angazhimin e NATO-s për të miratuar kërkesat për anëtarësim të Suedisë dhe Finlandës, gjë që do të zgjeronte krahun lindor të NATO-s.

Ai tha se Rusia po përdor dimrin si armë, duke goditur infrastrukturën jetike të Ukrainës e duke lënë civilët pa energji e ngrohje.

"Ne nuk mund ta lëmë Putinin të fitojë", tha zoti Stoltenberg. "Ky do të ishte një sinjal për udhëheqësit autoritarë në mbarë botën se ata mund të arrijnë qëllimet e tyre duke përdorur forcën ushtarake, duke e bërë botën një vend më të rrezikshëm për të gjithë ne. Pra, është në interesin tone të sigurisë të mbështesim Ukrainën”, tha ai.

“Ne duhet të jemi të përgatitur për më shumë sulme”, shtoi shefi i NATO-s. “Kjo është arsyeja pse NATO ka rritur mbështetjen e saj për Ukrainën me sisteme shtesë të mbrojtjes ajrore, si dronë, raketa me vetëdrejtim e balistike”.