...lufta fillon me kuptimin e shkaqeve të krizave dhe ajo vazhdon me ndryshimin e mendësisë dhe praktikës...

Bie në nivel rekord numri i të papunëve në Gjermani

"Tetori i artë", apo koha e mirë në Gjermani ka bërë që numri të papunëve të bjerë në nivel rekord. Momentalisht të papunë janë vetëm 2,2 milionë, që do të thotë më pak se 5%. Por jo vetëm kaq...

DW

30/10/2018 - 17:39

Në tregun e punës në Gjermani jo vetëm që ka rënë numri i të papunëve në tetor në 2,204 milionë, që është vlera më e ulët e ndonjë tetori prej ribashkimit të Gjermanisë, po me qindra mijëra vende të punës janë të lira. Papunësia ka rënë në krahasim me muajin shtator për 0,1 %, që do të thotë se papunësia në Gjermani aktualisht është vetëm 4,9%. Është kjo hera e parë që papunësia e llogaritur nga Agjencia Federale e Punësimit, bie nën 5%. Në krahasim me muajin e kaluar, numri i personave që kanë gjetur punë është shtuar për rreth 53.000. Ndërsa në krahasim me muajin tetor të vitit të kaluar, numri i të punësuarve është shtuar për 185.000 vetë, bëri të ditur Agjencia Federale e Punësimit, me seli në Nyremberg. Shefi i AP Detlef Scheele thotë: "Papunësia ka vazhduar rënien në muajin tetor."

Por në AP kanë qenë të regjistruar në tetor edhe 824.000 vende të lira të punës - 44.000 më shumë se para një viti. Numri i njerëzve të punësuar në Gjermani, në shtator të këtij viti, sipas të dhënave të Entit Statistikor, është 45,18 milionë të punësuar, që paraqet një plus prej 39.000 në krahasim me një muaj më parë. Ndërsa krahasuar me një vit më parë, numri i të punësuarve në Gjermani është shtuar me 561.000 punonjës.   Sipas të dhënave të fundit, në AP kanë qenë të regjistruar së fundi 2,292 persona, ndërsa rënia e papunësisë nuk ka të bëjë vetëm me punë sezonale. Numri i të papunëve ka rënë ngjashëm si në pjesët perëndimore ashtu edhe ato lindore të Gjermanisë.

Albania Web Design & Development by: WWW.FIT.ALFIT.AL WEB DESIGN ALBANIA