Qeveria e Trampit do të financojë nisma të përputhura me MAGA-n në Evropë

Qeveria e Trampit po përgatitet të vërë në zbatim një seri grantesh në Evropë dhe më gjerë për të mbështetur nisma të përputhura me lëvizjen MAGA, ndërsa ndjek një riorganizim rrënjësor të përparësive të ndihmës së jashtme amerikane.

Një nga objektivat kryesore të këtyre granteve është forcimi i lirisë së shprehjes në Britaninë e Madhe dhe në Evropë, të cilën qeveria pretendon se ndodhet nën sulm.

Grantet e propozuara përfshijnë 2 milionë dollarë për të kundërshtuar censurën që, sipas saj, buron nga rregulloret e Bashkimit Evropian, përfshirë Ligjin për Shërbimet Digjitale (Digital Services Act) dhe Ligjin për Tregjet Digjitale (Digital Markets Act), sipas një kopjeje të njoftimit që Departamenti amerikan i Shtetit u dërgoi ligjvënësve dhe që është shqyrtuar nga Financial Times.

Njoftimi nuk përcakton nëse qeveria ka zgjedhur tashmë një organizatë që do ta zbatojë këtë projekt. Ai paraqet gjithashtu planet për të dhënë 5 milionë dollarë për të zhvilluar një aleancë qytetërimore në Evropë. Përdorimet e mundshme të këtij granti përfshijnë nisma për mbrojtjen e lirisë së shprehjes, konkurrencës politike dhe sovranitetit kombëtar në kontinent.

Projekte të tjera të përfshira në njoftim janë më pranë përpjekjeve tradicionale të ndihmës së jashtme amerikane, përfshirë financimin e kërkimeve dhe të veprimtarive për t'iu kundërvënë përpjekjeve të qeverive autoritare për t'i heshtur kritikët e tyre jashtë vendit.

Një njoftim i dytë drejtuar ligjvënësve amerikanë përfshin fonde të paracaktuara për Free Speech Union International, një bashkësi organizatash e krijuar mbi bazën e organizatës britanike Free Speech Union, e themeluar nga anëtari konservator i Dhomës së Lordëve, Toby Young.

Sipas dy personave të njohur me çështjen, kjo organizatë pritet të marrë 5 milionë dollarë.

Young i tha Financial Times se organizata kishte "shprehur interes për të aplikuar për financim me grant nga Departamenti amerikan i Shtetit", me synimin "për të mbrojtur të drejtën e lirisë së shprehjes" në vendet ku ajo vepron. Ai shtoi se organizata ende nuk ka paraqitur një kërkesë zyrtare për këto fonde.

Megjithëse faqja e internetit e Free Speech Union thotë se ajo është jopartiake, kritikët pretendojnë se organizata është shndërruar në një mbështetëse të kauzave konservatore dhe "kundër kulturës woke".

The Guardian ishte media e parë që njoftoi mbi synimin e Departamentit amerikan të Shtetit për të financuar këtë organizatë. Projekte të tjera të propozuara përfshijnë 2 milionë dollarë për bashkësi në Evropën Lindore dhe në Ballkan, që kundërshtojnë përpjekjet e perceptuara për të dobësuar normat qytetëruese perëndimore, sipas njërit të njohur me çështjen.

Njoftimi përfshin gjithashtu mbështetje për përpjekjet që synojnë t'i kundërvihen tejkalimit të kompetencave nga gjyqësori dhe censurës në Brazil, ku Shtetet e Bashkuara kanë akuzuar zyrtarët se po përndjekin ish-presidentin e vendit, Jair Bolsonaro, një aleat i Trampit.

Ai paraqet gjithashtu plane për të dhënë 1 milion dollarë për dokumentimin e shkeljeve të të drejtave të njeriut ndaj pakicave etnike në Afrikën e Jugut. Dokumenti nuk u referohet shprehimisht afrikano-jugorëve të bardhë, por qeveria e Trampit ka pohuar vazhdimisht se ata janë viktima të diskriminimit dhe gjenocidit të mbështetur nga qeveria.

I pyetur për koment mbi fondet e propozuara, Departamenti amerikan i Shtetit tha se "programet janë ende në shqyrtim aktiv dhe marrja e një granti nuk u garantohet organizatave që nuk plotësojnë të gjitha kërkesat dhe standardet federale për grantet."

Njoftimi i dytë përfshin gjithashtu 7 milionë dollarë për qendrën e re studimore britaniko-amerikane 878, e bashkëthemeluar nga Jacob Rees-Mogg, ish-ministër në qeverinë konservatore britanike. Faqja e saj e internetit e përshkruan atë si një organizatë "të përkushtuar për forcimin e partneritetit qytetërues midis Mbretërisë së Bashkuar dhe Shteteve të Bashkuara."

Megjithatë, një person i njohur me çështjen tha se nuk ekzistojnë plane të tilla për financimin e 878 dhe se dokumenti ishte përgatitur nga një punonjës i ri i Departamentit amerikan të Shtetit, gjë që i habiti disa zyrtarë të lartë.

Granti më i madh i parashikuar në propozim është 40 milionë dollarë për Fondacionin Përkujtimor të Viktimave të Komunizmit, një organizatë jofitimprurëse amerikane kushtuar përkujtimit të viktimave të regjimeve komuniste. Ajo u themelua në vitin 1993 me një akt të Kongresit amerikan, të nënshkruar nga presidenti Bill Clinton.

Departamenti amerikan i Shtetit vuri në dukje se kjo organizatë ka marrë edhe më parë financime nga qeveria amerikane, përfshirë edhe gjatë qeverisë së Bajdenit.

Granti i propozuar do të përbënte një zgjerim të ndjeshëm për organizatën. Regjistrimi i saj më i fundit tatimor tregon se pasuria e saj e përgjithshme arrin në 12,1 milionë dollarë.

Njoftimi për këtë grant vjen ndërsa Trampi ka shtuar sulmet politike ndaj demokratëve, duke u përpjekur t'i paraqesë ata si komunistë përpara zgjedhjeve të mesmandatit që do të mbahen në nëntor.