Rusia e gatshme për bisedime me SHBA-në për çështje sigurie ndërsa Bajdeni përshkallëzon luftën në Ukrainë

Zëdhënësi i Kremlinit Dmitry Peskov tha të premten se Rusia është “e gatshme” për bisedime mbi çështje sigurie me Shtetet e Bashkuara, por shtoi tha se ato duhet të përfshijnë konfliktin në Ukrainë, e në mënyrë specifike atë që ai e quajti “angazhim të drejtpërdrejt” të Shteteve të Bashkuara atje.

Gjatë konferencës së rregullt me gazetarët, zëdhënësi Peskov tha se dialogu ndërmjet Shteteve të Bashkuara dhe Rusisë “është shumë i nevojshëm” për shkak “të problemeve të shumta të lidhura me arkitekturën globale të sigurisë”.

Zoti Peskov i bëri këto komente si përgjigje ndaj pyetjes rreth mundësisë së bisedimeve me Shtetet e Bashkuara rreth rreziqeve bërthamore pavarësisht konfliktit në Ukrainë.

Shtëpia e Bardhë njoftoi të enjten se do të vendosë Ukrainën në krye të listës për ta furnizuar me raketa të fuqishme për mbrojtje ajrore pas sulmeve të Rusisë me raketa dhe dronë që dëmtuan rrjetin energjetik nëpër tërë vendin gjatë natës.

Zëdhënësi i Shtëpisë së Bardhë për Siguri Kombëtare John Kirby u tha gazetarëve se qindra raketa të sapo prodhuara ‘Patriot” dhe ‘NASAMS’ – që përdoren për mbrojtje tokë-ajër – do të dërgohen në Ukrainë para se t’u jepen shteteve të tjera që i kanë porositur ato, duke iu referuar sulmeve të Rusisë ndaj infrastrukturës energjetike të Ukrainës.

Ukraina mund të godasë brenda Rusisë ‘kudo’ ku forcat e saj sulmojnë përtej kufirit

Shtetet e Bashkuara, raportoi Politico, i kanë thënë Ukrainës se mund të përdorë armë të furnizuara nga Amerika për të goditur çdo forcë ruse që sulmon nga përtej kufirit – jo vetëm ato në rajonin afër Kharkiv, sipas zyrtarëve amerikanë.

Ndryshimi delikat në kumte – për të cilin zyrtarët këmbëngulin se nuk është një ndryshim në politikë – vjen vetëm disa javë pasi SHBA i ndezi në heshtje Kievit dritën jeshile për të goditur brenda Rusisë në përgjigje të një sulmi ndërkufitar në qytetin e Kharkiv. Në atë kohë, zyrtarët amerikanë theksuan se politika ishte e kufizuar në rajonin e Kharkiv, ndër kufizimet e tjera.

Forcat ukrainase që atëherë kanë përdorur armë amerikane për të goditur Rusinë të paktën një herë, duke shkatërruar objektiva në qytetin e Belgorodit dhe kanë arritur të frenojnë sulmin rus. Por zyrtarë ukrainas dhe të tjerë evropianë i kanë ushtruar trysni ndaj SHBA-së që të lirojë edhe më tej kufizimet e saj, duke lejuar Ukrainën të godasë kudo brenda Rusisë.

Këshilltari për sigurinë kombëtare, Jake Sullivan i tha PBS të martën se marrëveshja me Ukrainën për gjuajtjen e armëve amerikane në Rusi shtrihet në "kudo ku forcat ruse po kalojnë kufirin nga pala ruse në atë ukrainase për të provuar të marrin një territor shtesë ukrainas".

Rusia ditët e fundit ka treguar se së shpejti mund të lëvizë në qytetin verilindor të Sumy, i cili është gjithashtu afër kufirit rus. Nëse kjo ndodh, politika do të zbatohej edhe atje, tha Sullivan.

“Kjo nuk ka të bëjë me gjeografinë. Bëhet fjalë për ndjesi të përbashkët. Nëse Rusia është duke sulmuar ose gati të sulmojë nga territori i saj në Ukrainë, ka kuptim vetëm të lejojmë Ukrainën të kundërpërgjigjet kundër forcave që po e godasin atë nga përtej kufirit, "tha Sullivan.

Dy zyrtarë amerikanë, të cilëve iu dha anonimiteti për të folur sinqerisht rreth diskutimeve, pohuan se lejimi i Ukrainës për të goditur brenda Rusisë në përgjigje të kundërzjarrit nga kudo përtej kufirit nuk është një ndryshim në politikë që nga marrja e vendimit të Kharkiv. Fillimisht, masa u karakterizua vetëm në kontekstin e sulmit të vazhdueshëm në Kharkiv, por kjo nuk përjashtoi mundësinë e kundërpërgjigjes kundër sulmeve të tjera ndërkufitare, tha një nga zyrtarët.

Megjithatë, gjuha e Sullivan është dukshëm e ndryshme nga ajo që zyrtarët amerikanë thanë në maj kur u detajua politika e re. Në atë kohë, një zyrtar i lartë amerikan tha: "Presidenti kohët e fundit udhëzoi ekipin e tij për të siguruar që Ukraina të jetë në gjendje të përdorë armët amerikane për qëllime kundër zjarrit në Kharkiv, në mënyrë që Ukraina të mund t'i kundërpërgjigjet forcat ruse që i godasin ose përgatiten për t'i goditur ato."

Politika e moslejimit të sulmeve me rreze të gjatë brenda Rusisë "nuk ka ndryshuar", theksoi zyrtari.

Putini dhe Koreja e Jugut

Ndërkohë, gjatë vizitës në Azi, Presidenti rus Vladimir Putin paralajmëroi të premten Korenë e Jugut kundër dërgimit të armatimit në Ukrainë.

Zyrtarë të lartë të Koresë së Jugut thanë të enjten se marrëveshja e nënshkruar gjatë kësaj jave ndërmjet Rusisë dhe Koresë së Veriut përmes së cilës dy shtetet zotohen të mbrojnë njëra-tjetrën në rast lufte paraqet “një rrezik të madh” dhe se Seuli po shqyrton mundësinë që të dërgojë armë Ukrainës si kundërpërgjigje, që shënon përmbysje të politikës së deritashme për të mos u dhënë armë shteteve të janë të angazhuara në konflikte.

Zoti Putin u përgjigj të premten duke thënë se Koreja e Jugut nuk ka arsye për t’u shqetësuar rreth traktatit të Rusisë me Korenë e Veriut, por shtoi se nëse Seuli i dërgon armë Ukrainës ky do të ishte “një gabim shumë i madh.” Ai shtoi, “nëse e bën një gjë të tillë, atëherë do të marrim vendime të caktuara që nuk do t’i pëlqejnë aspak udhëheqësve aktualë të Koresë së Jugut.”

Ofensiva ukrainase

Ukraina u përgjigj ndaj sulmeve ruse të premten me një sulm ndaj rafinerive të naftës, radarëve dhe qendrave të zbulimit në pjesë jugore të Rusisë dhe në Krimenë e pushtuar.

Shtabi i Përgjithshëm i ushtrisë ukrainase njoftoi se forcat ukrainase sulmuan një depo karburantesh dhe lëndësh kimike në rajonin Tambov të Rusisë, si dhe një depo vaji në Adygea. Sipas raporteve ruse, një person ka humbur jetën në sulme. Zyrtarët rusë pretenduan se shkatërruan 114 dronë ukrainase.

Rrjeti energjetik i Ukrainës nën sulm

Kompania furnizuese e energjisë elektrike e Ukrainës, Ukrenergo, njoftoi të enjten se sulmi rus ndaj termo-elektranës shkaktoi dëme serioze. Gjatë tij u lënduan tre punonjës.

“Pajisjet në Vinistia, Dnipropetrovsk, Donetsk dhe Kiev janë dëmtuar”, njoftoi Ukrenergo përmes një kumtese.

Të mërkurën, Ukrenergo njoftoi se reduktime të rregullta një orëshe të energjisë elektike do të zbatoheshin në tërë vendin. Sulmet ruse me dronë dhe raketa kanë përgjysmuar kapacitetin e prodhimit të energjisë elektrike të Ukrainës krahasuar me vitin e kaluar, sipas Presidentit ukrainas Volodymyr Zelenskyy.   

Ky raport i Voa-s është zgjeruar me raportin e Politico