Rusia paralajmëron (për herë të parë) me hakmarrje SHBA-në

Rusa mëton se sulmi u krye me raketa të furnizuara nga Shtetet e Bashkuara. “Patjetër që do të merren masa në shenjë hakmarrjeje”, tha ministria e Jashtme e Rusisë. Ministria nuk dha më shumë hollësi.

Ministria e Mbrojtjes së Rusisë tha të dielën se Shtetet e Bashkuara, që kanë furnizuar Ukrainën me raketat taktike ATACMS janë përgjegjëse për sulmin ndaj civilëve. Sipas autoriteteve, raketat ATACMS u përdorën në sulmin që la të vrarë 4 persona dhe plagosi 150 të tjerë.

Përfshirja e SHBA-së në sulmin vdekjeprurës të municioneve thërrmuese ukrainase në një plazh të mbushur me njerëz në Sevastopol të Rusisë do të ketë pasoja, tha dje zëdhënësi i Kremlinit Dmitry Peskov.

“Ne shohim … një sulm absolutisht barbar me raketa në Krime. Ne e kuptojmë shumë mirë se kush qëndron pas kësaj… kush po i drejton këto raketa absolutisht komplekse teknikisht drejt objektivave,” u tha Peskovi gazetarëve gjatë një konference për shtyp të hënën.

“Duhet të pyesni kolegët e mi në Evropë, dhe mbi të gjitha në Uashington, të pyesni sekretarët e shtypit atje pse qeveritë e tyre po vrasin fëmijë rusë. Thjesht bëni atyre këtë pyetje”, u tha Peskovi gazetarëve të pranishëm.

John Bass, nënsekretar në detyrë për çështjet të politikës së jashtme pranë Departamentit të Shtetit i tha Zërit të Amerikës se nuk ishte në dijeni të bilancit të viktimave si pasojë e sulmit, por tha se ka një dallim të thellë mbi mënyrën se si Ukraina dhe Rusia kryejnë sulmet e tyre.

Ai tha se ështët e nevojshme që Ukraina të marrë masa për të minimizuar dëmet ndaj civilëve ndërsa sulmet e Rusisë kanë qenë që në fillim tejet të ashpra.

Javën e kaluar, Uashingtoni i hapi udhë Ukrainës që të përdorë raketat me rreze më të gjatë të furnizuara nga SHBA-të brenda Rusisë, por vetëm për vetëmbrojtje. Vendet perëndimore kanë hezituar të lejojnë Ukrainën të përdorë armët e tyre në Rusi, sepse nuk duan të provokojnë Rusinë dhe të përshkallëzojnë konfliktin.

Rusia aneksoi Krimenë nga Ukraina në vitin 2014, një akt që shumica e botës e ka kundërshtuar. Rusia, megjithatë, vazhdon ta konsiderojë Krimenë pjesë të Rusisë.

Ndërkohë, zyrtarët ukrainas njoftuan mbi një sulm të Rusisë me raketa ruse në qytetin jugor të Ukrainës, Odesa, nga i cili u plagosën tre persona. Ministria e Mbrojtjes së Rusisë tha të hënën se forcat e saj shkatërruan katër dronë ukrainas mbi rajonin e Rostovit.   

Ky raport i Voa-s është përditësuar me qendrimin e zëdhënësit të Kremlinit