Votuesit italianë rrëzuan nismën referendare të Melonit

Meloni për ndryshime në sistemin e drejtësisë, duke i dhënë një goditje politike të ndjeshme qeverisë së saj

Me shumicën e votave të numëruara të hënën, kampi “jo” kryesonte me 53.7%, duke i dhënë fund një referendumi të tensionuar kombëtar mbi ndryshimet kushtetuese, të cilat kritikët i quajtën si rrezik për pavarësinë e gjyqësorit.

Pjesëmarrja prej rreth 59% ishte më e lartë se sa pritej, çka tregon se shumë qytetarë iu përgjigjën thirrjeve të opozitës për të mbrojtur shtetin e së drejtës.

Meloni shprehu keqardhje për atë që e quajti një mundësi të humbur për të modernizuar Italinë, por theksoi se do të vazhdojë mandatin e saj. Ajo nënvizoi se rezultati nuk e ndryshon përkushtimin e saj për të punuar për të mirën e vendit.

Megjithatë, rezultati përbën një goditje për kryeministren, e cila kishte investuar shumë kapital politik në këtë reformë. Ndryshe nga ish-kryeministri Matteo Renzi, i cili dha dorëheqje pas një referendumi të humbur, Meloni kishte deklaruar më herët se nuk do të largohej nga detyra në rast refuzimi.

Sipas analistëve, ky rezultat e dobëson politikisht qeverinë. Profesori Lorenzo Castellani e quajti Melonin të dobësuar, ndërsa këshilltari politik Ernesto Di Giovanni e pa votimin si një sinjal të qartë pakënaqësie publike përpara zgjedhjeve parlamentare të vitit të ardhshëm.

Nga ana tjetër, opozita reagoi ashpër. Elly Schlein e cilësoi rezultatin si refuzim të arrogancës së qeverisë, ndërsa Giuseppe Conte tha se qytetarët kërkojnë një politikë ndryshe, më pranë nevojave të tyre dhe më pak të përqendruar tek mbrojtja e politikanëve nga hetimet.

Meloni ka qenë shpesh në përplasje me gjyqësorin, i cili ka rrëzuar disa nga politikat kryesore të saj, përfshirë planin për të mbajtur azilkërkues në qendra në Shqipëri dhe projektin për një urë të madhe drejt Siçilisë. Ndryshimet e propozuara synonin riorganizimin e vetëqeverisjes së gjyqtarëve dhe krijimin e një organi të ri disiplinor.

Megjithatë, kundërshtarët argumentuan se këto masa nuk do të zgjidhnin problemin kryesor të sistemit italian – vonesat e gjata në proceset gjyqësore – dhe paralajmëruan se ato mund të hapnin rrugë për ndikim më të madh politik mbi drejtësinë, në një mënyrë të ngjashme me atë që kritikët i mveshin Viktor Orbánit në Hungari.