Labinot Gjini: E meta e Kurtit - është pakicë në parti

Kurti pas përfundimit të zgjedhjeve lokale prej të cilave LVV doli me humbje, tha se ka disa 'të meta' brenda saj. Por nuk ka sqaruar 'të metat' e saj. Ndërsa presim të na sqarojë, Gjini, një kritik i tij, beson se ai është pakicë brenda partisë. Komenti i tij: 

Problemi kryesor i Albin Kurtit është se ai, ka kohë që është minoritet në partinë e vetë. Koha Ditore, që thërrasim për hir të historisë LVV, është parti e reaksionarëve të rinj dhe të vjetër, të cilët duan të kthejnë privilegjet e tyre të paraluftës. Ata janë bërë prej kohësh shumicë në këtë parti dhe ambiciet e tyre, për një hakmarrje e kthim mbrapa, nuk përputhen me ato të Albinit që janë për një ecje para.

Sado Albini të dojë të tejkalojë gjendjen, partia e kapur nga poshtë (nga ish militantët më reaksionar të LDK), nga brenda (grupet e interesit në struktura, delegatë e deputet në Kuvend(e)) dhe nga sipër (Vjosa Osmani, ministrat e listës Guxo) nuk e lë të dalë nga riorientimi i saj.

Dhe, këtë gjendje nuk ka asnjë shans që ta kthejë Albini sepse baza tjetër është reduktuar në heshtje, dhe spektatore në pafuqinë e saj. Është bazë politike që nuk mund të trafikohet dhe që Albini nuk mund t'ju besojë sepse është bazë që nuk është e ngritur prej tij, por është bazë që e ka ngritur atë. Ky raport e ka shtyrë që ai të kërkojë një bazë më pak politike në thelb, por më të frustuar nga ana shoqërore e ekonomike, përkitazi më ambicioze për të rifituar terrenin e privilegjeve.

Sot, ai është minoritet përbrenda partisë dhe, si rrjedhojë, përbrenda Qeverisë. Dhe ky është "defekti i brendshëm" që ai nuk do ta pranojë edhe për një kohë të gjatë. Ky është edhe motivi që e ka shtyrë që të heqë dorë nga Tirana dhe nga vizioni i majtë. Ai ka kohë që nuk e ka më nën kontroll orientimin ideologjik të partisë. Ajo që ishte LVV, tanimë është Koha Vizion.

Andaj, edhe përzgjedhjet e listës së deputetëve, ministrave, ambasadorëve etj., do të jenë gjithnjë e më shumë të nxjerrë nga Koha Vizion dhe jo nga LVV. Çerdhja e Albinit tanimë është tjetërkund. Dhe saherë që Albini do të tentojë për t'u kthyer tek baza e tij e parë, shantazhet do të vijnë mënjeherë nga baza dhe struktura tjetër për t'ia rikujtuar se sa i dobët është.

Zgjedhjet lokale ishin, thjesht, një paralajmërim për të: do të japim fuqi e pushtet, por jo sa të mundesh të na kontrollosh. Kontrolli do të mbetet tek reaksionarët me të cilët Albini hyri në ujdi. Çdo tentativë për të marrë nën kontroll orientimin e partisë, do të jetë fatale për Albinin. Sidomos kur baza tjetër veçse nuk është më.