SHBA-ja provon raketë ndërkontinentale ndërsa zhvillon lojra luftarake pranë Koresë V.

Ushtria amerikane njoftoi sot se kreu një provë me raketën balistike ndërkontinentale "Minuteman 3", provë e shtyrë për të shmangur shkallëzimin e tensioneve me Kinën, gjatë manovrave që Pekini kreu pranë brigjeve të Tajvanit.

Prova me raketë tregon “gadishmërinë e forcave bërthamore amerikane dhe tregon besim në forcën goditëse dhe efektshmërinë e politikës amerikane të frenimit bërthamor”, thuhet në njoftimin e ushtrisë amerikane.

Zyrtarët thanë se në të kaluarën janë kryer rreth 300 prova të kësaj natyre dhe e tanishmja nuk lidhet me ndonjë zhvillim të caktuar ndërkombëtar.

Në muajin prill ushtria amerikane anuloi një tjetër provë me raketën ndërkontinentale për të ulur tensionet bërthamore, ndërsa Rusia po kryente sulmin në Ukrainë.

Raketa "Minuteman 3", prodhim i firmës Boeing, e aftë të pajiset me mbushje bërthamore, është një nga raketat kryesore të arsenalit bërthamor amerikan. Ajo ka një rreze prej mbi 9600 kilometrash dhe lëviz me një shpejtësi mbi 24 mijë kilometrash në orë. Voa

Paralelisht SHBA-ja po zhvillon simulime luftarake me Japoninë dhe Korenë e Jugut në brigjet e Havait, të parat që nga viti 2017. Pentagoni tha se lojërat luftarake që do të zgjasin rreth një javë, zhvillohen për t`u përgjigjur ndaj “sfidave” të Koresë Veriore. Besohet se kjo e fundit do të provojë një armë tjetër bërthamore, e cila do të jetë e para pas një vetë-moratoriumi disa vjeçar.