Kimi braktis planet për bashkim mes dy Koreve

Lideri verikorean, Kim Jong Un, ka thënë se bashkimi me Korenë e Jugut nuk është më i mundshëm dhe duhet ndryshuar Kushtetuta për ta shpallur atë “armik kryesor”. Kimi ka thënë se tri organizatat që merren me çështje të bashkimit duhet të mbyllen, sipas medias shtetërore KCNA.

Presidenti i Koresë së Jugut, Yoon Suk Yeol, ka thënë se do të përgjigjet “disa herë më ashpër”, nëse do të ketë provokime prej Koresë së Veriut.

Dy Koretë janë ndarë prej Luftës Koreane, që ka përfunduar më 1953. Ato nuk kanë nënshkruar traktat të paqes, prandaj teknikisht janë në luftë qysh atëherë. Në një fjalim të mbajtur para Asamblesë Supreme Popullore – parlamentin verikorean – Kimi ka thënë se Kushtetuta duhet të ndryshohet për t’i edukuar verikoreanët se Koreja e Jugut është “armik kryesor”.

Ai ka thënë që nëse shpërthen lufta në Gadishullin Korean, Kushtetuta e shtetit duhet të reflektojë çështjen e “pushtimit”, dhe “inkorporimit” të Koresë së Jugut në territorin e vet.

Kimi – i cili e ka zëvendësuar babanë e tij, Kim Jong-il, si lider verikorean më 2011 – ka thënë se Koreja e Veriut “nuk dëshiron luftë, mirëpo nuk synon ta shmangë atë”, sipas medias shtetërore.

Në një raport të publikuar javën e kaluar për North 38 – organizatë me bazë në Shtetet e Bashkuara, me fokus në Korenë e Veriut – ish-zyrtari i Departamentit amerikan të Shtetit, Robert Carlin, dhe shkencëtari bërthamor Siegfried S Hecker, kanë thënë se gjendja në Gadishullin Korean është “më e rrezikshme se kurrë më parë”.